Покана за прв јавен собир за изготвување на локалната стратегија за климатски промени во општина Пехчево Печати
Напишано од Живко Каликов   
Вторник, 11 Јуни 2013 09:38


Почитувани граѓани на општина Пехчево


Секојдневно сме сведоци на голем број негативни последици од климатските промени, како што се прекумерни суши, поплави, пожари, ерозии кои се повеќе се чувствуваат и кај нас. Справувањето со климатските промени и навремено дејствување е од голема важност.

Општина Пехчево имаше чест да биде избрана во првите четири општини во Македонија каде ќе се спроведува проектот Општински стратегии за климатски промени, кој е финансиран од УСАИД, а го спроведува Милиеуконтакт Македонија. Во општина Пехчево проектот се спроведува во партнерство на Центарот за лековити билки и шумски плодови Амброзија и општина Пехчево.

За таа цел во четврток, на 13.06.2013 година со почеток во 18 часот во просториите на ресторан Тропик ќе имате можност да се запознаете со проектот Општински стратегии за климатски промени и како тој може да придонесе за нашата општина.

Целта на овој проект е утврдување на вредностите на нашата општина и нивна заштита преку предложени мерки за справување со климатските промени. Кои се вредности на општина Пехчево и како да ги заштитиме истите најубаво знаеме ние, граѓаните на општина Пехчево, па затоа Ве покануваме да дојдете на овој собир и да го дадете својот придонес бидејќи со заштита на нашите вредности се штитиме и самите себеси и нашата животна средина.

На настанот свое обраќање ќе имаат Игор Славковски - Директор на Милиеуконтакт Македонија, градоначалникот на општина Пехчево Игор Поповски како и голем број други експерти и соработници.

Општина Пехчево има вредности кои заслужуваат да бидат заштитени, а дали и колку ќе бидат заштитени зависи од нас и нашиот активен придонес.